Inicio

José de la Gándara Sestelo

Quizais a José de la Gándara recórdeselle máis en Vigo por ser presidente do Centro de Instrución Mercantil (actual Círculo Mercantil) onde desempeñou unha dilatada labor de 1894 a 1899. O caso é que este redondelán de nacemento casado con Joaquina Cividanes Rodríguez foi un próspero empresario con moitísimo peso e influenza no Vigo de finais do S. XIX e principios do S. XX. Na Cámara o seu labor centrouse nas obras portuarias e na posta en marcha do Depósito Franco -antesala da Zona Franca-. A súa vinculación coa institución data de 1886, data na que aparece como secretario da sección de Comercio na primeira xunta directiva da historia. Máis tarde sería vicepresidente, contador e, por fin, presidente de 1921 a 1924. Na súa actividade particular compraría á familia Laforet un gran almacén de coloniais, establecido onde hoxe se atopa o teatro-cine Fraga. Como ben sinala o xornalista Gerardo González Martín en numerosos artigos e no libro "Cen anos de interese por Vigo", tamén fundou a conserveira "Gándara y Haz" hoxe desaparecida. Entre os seus cargos públicos, sumou aos xa mencionados a presidencia da Xunta do Porto e Ría de Vigo, función que desempeñaría ata 1919. Na década seguinte, José de la Gándara formou parte do consello de administración do Banco de Vigo xunto a outros accionistas daquel momento, como Gaspar Massó, Eugenio Fadrique ou Wenceslao González Garra. Entre as pegadas visibles hoxe das súas accións está o monumento que impulsou en Monteferro en memoria dos mariños mercantes falecidos nos mares de todo o mundo durante a primeira guerra mundial.

José de la Gándara, que xa en 1889 perdera a un fillo, enviudaría novo (en 1903). Do matrimonio quedaban cinco fillos, tres mulleres e dous varóns: Esperanza, Joaquina, Mercedes, José e Ángel. Pouco antes do falecemento da súa muller, fora un dos máis activos membros da comisión organizada para recibir en Vigo a centenares de portugueses de Oporto e poboacións limítrofes na que foi unha das primeiras accións de hermanamento con Portugal.

Xunta directiva 1921-1924

Presidente: José de la Gándara Sestelo
Vicepresidente: Mauro Alonso Cuenca
Vicepresidente: Estanislao Durán David
Tesoureiro: Daniel Saenz Díez
Contador: Antonio González Castro
Secretario xeral: Manuel Carsi Rivera